I diari de Siora Jole

Scriver un Diario per zercar de passar el tempo in casa. A dir el vero in sti quatro muri no me son mai 'noiada. Ultimamente po, costreta a star serada, fazo robe 'ssai interessanti. Sposto la roba da una parte al'altra, dopo no la trovo pi e alora torno a zercarla... e intanto passo el tempo!
Son solo in pensier per mio fio che el gaveva de rifar la carta de identita: tra Locdun, prenotazioni e mascherine no xe sta' facile. Come se no bastassi, una volta 'rivado l quei del Comun no i ghe la ga voluda far.
E cussi me toca a mi lunedi de acompagnarlo. Xe l'unico modo. Par impossibile, ma a zinquanta ani sonai, per gaver un documento, mio fio ga de presentarse in Comun acompagnado da su mama.
Giuro, l'altro giorno al banco i xe stai categorici:
"Se la vol la carta de identita nova la ga de vegnir qua co' la vecia".
E cussi lunedi 'ndaremo zo in due.