Saat-Panch / सात - पांच

Aapke hathon me ek choti si kitab de raha hun, jo 'umeed se' hai. Mujhe lagta hai ki kavita hamesha 'umeed se' hoti hai, chahe vo kisi bhi paripekhsha me likhi ho. Satvin kaksha mein madam Sunita Malohtara ke kehne par pehli kavita likhi thi aur ye nischaya kiya tha ki ek din khoob sari kahunga.Chaalis baras beet gaye par abhi theek se chaalis bhi nahi keh paya. Halanki zindagi sarpat bhaagi hai, par jab kabhi bhi ruki hai, kavita ban ruki hai. Haule se, kanon mein madham sa sur liye kuch-kuch sunati rahi hai, jo mujhe hamesha ek kavita si lagi. bas wahi kavita aapse keh rha hoon. par sambhaal ke 'umeed se' hai.